Stemmen op smokkie, poppie, prugeltie, tutebekkie of wichie/maagie/maegie

DRENTHE - Streektaolorganisatie Huus van de Taol is in december drok met de zuuktocht naor het liefste Drentse woord. Nao een week woorden insturen is het nou tied veur het stemmen op de vief liefste woorden. Stemmen kan op www.huusvandetaol.nl/lief

Ban 1 tot en met 8 december kun elkenien een woord insturen. Dat gebeurde zu’n 400 maol, met een prachtig gevarieerd risseltaot. ,,Dat Drenten romantischer bint as aj vermoeden kunden is dudelijk te zien an de inzendingen,’ volgens streektaolfunctionaris Arja Olthof. ,,Laiverd, smorregie, mien botterbloumpie en loekertie bint zomaor wat woorden die instuurd bint.’

Het gung veural um koosnamen die binnenkwamen, en de mieste van die woorden waren vaak verkleinwoorden as laifie, toezebollegie of mien meidtie. Daornaost kwamen der ok nog veul lief klinkende woorden binnen as sukerklontie, mamme, meizuvertie en nuver.

De vief woorden waoraj tot en met 21 december op stemmen kunt bint:

Smokkie – kusje;

Poppie – baby;

Prugeltie – klein, ondeugend kind;

Tutebekkie – mondje, of schatje;

Wichie/maagie/maegie – meisje (in Zuud- en West-Drenthe een maagie/maegie, in de rest van de provincie een wichie)

Het liefste Drentse woord wordt ’s mörgens op 22 december bij radio Drenthe bekendmaakt.